ఏరువాక వచ్చినా.. ఎక్కడి ధాన్యం అక్కడే!

పాలకొల్లు పట్టణం, న్యూస్‌టుడే: ఏరువాక పౌర్ణమి వచ్చినా రైతులు అరక పట్టలేని పరిస్థితి. ఎందుకంటే.. నేటికీ గత పంటను విక్రయించేందుకు మిల్లుల వద్ద పడిగాపులు పడాల్సి వస్తోంది. పశ్చిమ గోదావరి జిల్లా పాలకొల్లు మండలం భగ్గేశ్వరం గ్రామంలోని రైస్‌ మిల్లు పరిసరాల్లో ధాన్యం ట్రాక్టర్లను చిత్రంలో చూడొచ్చు. రైతులు ధాన్యం లోడ్లు తీసుకొచ్చి మిల్లు పక్కనే ఉన్న ఖాళీ లేఅవుట్‌లో నిలిపి మూడు నుంచి 5 రోజుల పాటు ఎదురుచూస్తున్నారు. ఆదివారం అక్కడి రైతులను పాలకొల్లు ఎమ్మెల్యే నిమ్మల రామానాయుడు కలిశారు. టీవీఎస్‌ వాహనం నడుపుతూ రైతుల వద్దకు వెళ్లారు. రైస్‌ మిల్లుల వద్ద కర్షకులు కాపురాలు పెట్టుకోవాల్సి వచ్చిందని ఆవేదన వ్యక్తం చేశారు.