పర్చూరులో ఫారం-7 విచారణలో నిబంధనల ఉల్లంఘన

రాష్ట్ర ఎన్నికల ప్రధాన అధికారికి తెదేపా ఎమ్మెల్యేల లేఖ

మార్టూరు, న్యూస్‌టుడే: ఎన్నికల కమిషన్‌ నిబంధనలకు విరుద్ధంగా బాపట్ల జిల్లా పర్చూరు నియోజకవర్గంలో ఫారం-7 విచారణలో ఉల్లంఘనలు చోటు చేసుకుంటున్నాయని తెదేపా ఎమ్మెల్యేలు ఏలూరి సాంబశివరావు, గొట్టిపాటి రవికుమార్‌, డోలా శ్రీబాలవీరాంజనేయస్వామి తెలిపారు. ఈ మేరకు రాష్ట్ర ఎన్నికల ప్రధాన అధికారి ముఖేశ్‌కుమార్‌ మీనాను కలిసి శుక్రవారం వినతిపత్రం అందజేశామన్నారు. నిబంధనలకు విరుద్ధంగా వ్యవహరించిన అధికారులపై ఉన్నతాధికారులకు ఫిర్యాదు చేసినప్పటికీ ఎలాంటి చర్యలు     తీసుకోలేదని, కొందరు నేతల ఒత్తిడితోనే వారిని కొనసాగిస్తున్నారని అన్నారు. తెదేపా సానుభూతిపరుల ఓట్లు తొలగించేందుకు అధికార పార్టీ నేతలు కుట్ర చేస్తున్నారని ఆరోపించారు. క్షేత్ర స్థాయి విచారణలో ఇష్టానుసారం వ్యవహరించిన జిల్లా ఎన్నికల అధికారి, ఎన్నికల రిటర్నింగ్‌   అధికారి, ఆయన సహాయకులపై తక్షణమే విచారించి చర్యలు తీసుకోవాలని కోరామన్నారు. అలాగే పర్చూరు నియోజకవర్గం ఎలక్ట్రోరల్‌ రిజిస్ట్రేషన్‌ అధికారి ఎన్నికల మార్గదర్శకాలను ఉల్లంఘిస్తూ ఓటర్లకు నోటీసులిస్తున్నారని ఆరోపించారు.