మీరు జైల్లో ఉన్నప్పుడు అలా అనలేదేం?

విజయసాయిరెడ్డికి బాలకోటయ్య ప్రశ్న

ఈనాడు డిజిటల్‌, అమరావతి: చట్టం ముందు అందరూ సమానమేనని సీఎం జగన్‌తో కలిసి 16 నెలలు జైలు జీవితం గడిపినప్పుడు అనలేదేం? అని వైకాపా ఎంపీ విజయసాయిరెడ్డిని అమరావతి బహుజన ఐకాస అధ్యక్షుడు పోతుల బాలకోటయ్య ప్రశ్నించారు. అప్పట్లో సోనియాగాంధీనే కుట్ర చేశారని చెప్పారు గుర్తులేదా? అని నిలదీశారు. ‘చట్టం ముందు అందరూ సమానమే.. 73 ఏళ్ల చంద్రబాబును అరెస్టు చేస్తే తప్పేంటి?’ అంటూ విజయసాయిరెడ్డి చేసిన ట్వీట్‌పై ఆయన స్పందించారు. ‘‘నిజమా విజయసాయి గారు.. మిమ్మల్ని అరెస్టు చేస్తే మాత్రం కుట్రలు, చంద్రబాబును చేస్తే కాదా? ఇప్పుడైనా చెప్పండి మీపై పెట్టిన 11 సీబీఐ, 7 ఈడీ కేసులు నిజమని’’ అని బాలకోటయ్య శనివారం రీట్వీట్‌ చేశారు.