జగన్‌ మళ్లీ ఎందుకు? రాష్ట్రాన్ని వెనక్కి నెట్టినందుకా?

మాజీ మంత్రి కళా వెంకట్రావు ధ్వజం

ఈనాడు, అమరావతి: నాలుగున్నరేళ్ల పాలనలో రాష్ట్రాన్ని 40 ఏళ్లు వెనక్కి నెట్టి.. సిగ్గు లేకుండా మళ్లీ జగనే కావాలంటూ ప్రచారం చేయిస్తారా? అంటూ మాజీ మంత్రి కళా వెంకట్రావు ధ్వజమెత్తారు. ‘వైకాపాకు వచ్చే ఎన్నికల్లో 3 స్థానాలకు మించి రావని సర్వేలో తేలింది. దీంతో జగన్‌ మేకపోతు గాంభీర్యం ప్రదర్శిస్తూ 175 స్థానాల్లో గెలుపు పేరుతో ప్రజల్ని మభ్యపెట్టేందుకు ప్రయత్నిస్తున్నారు’ అని ఓ ప్రకటనలో పేర్కొన్నారు. చంద్రబాబు అక్రమ అరెస్టును నిరసిస్తూ ప్రకాశం జిల్లా గిద్దలూరులో వైకాపా జడ్పీటీసీ, సర్పంచులు తెదేపాలో చేరేందుకు ప్రయత్నిస్తే.. వారిని కిడ్నాప్‌ చేయడానికి కూడా ఆ పార్టీ నేతలు ప్రయత్నించారని దుయ్యబట్టారు. ‘ఆంధ్రాకి జగన్‌ ఎందుకు కావాలి..? 2.13 లక్షల ఉద్యోగాలు ఇవ్వకుండా యువతను మోసం చేసినందుకా? కమీషన్ల కోసం పరిశ్రమల్ని తరిమేసినందుకా? మద్య నిషేధమని మాట తప్పి.. నాసిరకం మద్యంతో మహిళల తాళిబొట్లు తెంచుతున్నందుకా? తనపై ఉన్న కేసుల మాఫీకి ప్రత్యేక హోదాను తాకట్టు పెట్టి.. రాష్ట్రానికి ద్రోహం చేసినందుకా? సీపీఎస్‌ రద్దు పేరుతో ఉద్యోగుల్ని మోసం చేసినందుకా?’ అని ప్రశ్నించారు.