న్యూజెర్సీలో తెదేపా మహానాడు

ఈనాడు డిజిటల్‌, అమరావతి: తెదేపా ఎన్నారై విభాగం ఆధ్వర్యంలో అమెరికాలోని న్యూజెర్సీలో మహానాడు కార్యక్రమాన్ని శనివారం ఘనంగా నిర్వహించారు. ఎన్టీఆర్‌ విగ్రహానికి పూలమాల వేసి నివాళి అర్పించారు. ఈ సందర్భంగా తెదేపా పొలిట్‌బ్యూరో సభ్యుడు గోరంట్ల బుచ్చయ్యచౌదరి మాట్లాడుతూ..ఏపీలో తెదేపా తిరిగి అధికారంలోకి రావడానికి ప్రవాసాంధ్రులు కీలక భూమిక పోషించాలని కోరారు. సామాజిక మాధ్యమాల ద్వారా ప్రజలను చైతన్యపరచాలని సూచించారు. ప్రజాబలంతో తెదేపా రాజకీయ కుట్రలను  ఎదుర్కొని నిలబడిందని శాసనసభ మాజీ ఉపసభాపతి మండలి బుద్ధప్రసాద్‌ తెలిపారు. కార్యక్రమంలో తెదేపా ఎన్నారై విభాగం అమెరికా కోఆర్డినేటర్‌ కోమటి జయరాం, గుంటూరు మిర్చియార్డు మాజీ ఛైర్మన్‌ మన్నవ సుబ్బారావు తదితరులు పాల్గొన్నారు.