Balineni Srinivasa Reddy: నాటకాలు ఆపకపోతే కాళ్లు విరగ్గొడతా!

సొంత పార్టీ నేతలకు బాలినేని హెచ్చరిక

ఒంగోలు ట్రంకురోడ్డు, న్యూస్‌టుడే: సొంత పార్టీ నేతలే ప్రతిపక్షంతో చేతులు కలిపి తనకు వ్యతిరేకంగా నాటకాలు ఆడుతున్నారని, ఇప్పటికైనా వారు పద్ధతి మార్చుకొని వాటిని ఆపకపోతే కాళ్లు విరగ్గొడతానని మాజీ మంత్రి, ఒంగోలు ఎమ్మెల్యే బాలినేని శ్రీనివాసరెడ్డి తీవ్ర స్థాయిలో హెచ్చరించారు. ఇప్పటివరకు ఓపిక పట్టానని... తాను తింటుందీ ఉప్పూ కారమేనని... ఇకపై ఈ తరహా వ్యవహారాలు సహించేది లేదని ఘాటుగా వ్యాఖ్యానించారు. మంగళవారం నిర్వహించిన ఒంగోలు నియోజకవర్గ వైకాపా ప్లీనరీలో ఆయన మాట్లాడారు. ‘ప్రతిపక్ష పార్టీకి చెందిన మాజీ ఎమ్మెల్యే జనార్దన్‌, మున్సిపల్‌ మాజీ ఛైర్మన్‌ మంత్రి శ్రీనుతో మా పార్టీకి చెందిన కొందరు చేతులు కలిపి ఓ పథకం ప్రకారం నాపై దుష్ప్రచారం చేస్తున్నారు. వారు ఎవరన్నది నాకు తెలుసు. వారు ఎంత పెద్ద నాయకులైనా వదిలిపెట్టేది లేదు. ఈ విషయాన్ని సీఎం జగన్‌  దృష్టికి తీసుకువెళ్తాను. ఇప్పటివరకు అన్నీ సహించాను. ఇకపై భరించే సహనం నాకు లేదు...’ అని పేర్కొన్నారు.