దళితవాడలను బంగారు మేడలుగా మారుస్తాం

మంత్రి పువ్వాడ అజయ్‌కుమార్‌

చింతకాని, న్యూస్‌టుడే: దళితబంధు పథకాన్ని చూసి తెలంగాణలోని అన్ని ప్రతిపక్ష పార్టీల నేతలు విస్తుపోతున్నారని రాష్ట్ర రవాణా శాఖ మంత్రి పువ్వాడ అజయ్‌కుమార్‌ పేర్కొన్నారు. ఈ పథకంతో రాష్ట్రంలోని దళితవాడలను బంగారు మేడలు చేయాలన్నదే ప్రభుత్వ ఆశయం అన్నారు. ఖమ్మం జిల్లా చింతకాని మండలం నాగులవంచ, కొదుమూరు గ్రామాల్లో బుధవారం దళితబంధు పథకం కింద లబ్ధిదారులకు మంత్రి వాహనాలను అందజేశారు. నాగులవంచలో హార్వెస్టర్‌ను ప్రారంభించారు. ఈ సందర్భంగా మంత్రి మాట్లాడుతూ.. సీఎం కేసీఆర్‌ ప్రవేశపెడుతున్న పలు పథకాలు భారతదేశానికే స్ఫూర్తిగా నిలుస్తున్నాయన్నారు.