తెలంగాణపై భాజపా రాజకీయ తీర్మానం!

ఈనాడు, హైదరాబాద్‌: రాజధానిలో జరిగే జాతీయ కార్యవర్గ సమావేశాల్లో చర్చించాల్సిన అంశాలపై ఎజెండా తయారీ, తీర్మానాల విషయంపై భాజపా కసరత్తు ప్రారంభించింది. జాతీయస్థాయికి సంబంధించిన విషయాలతో పాటు తెలంగాణకు సంబంధించిన అంశం కూడా ఉండనున్నట్లు తెలిసింది. విశ్వసనీయవర్గాల సమాచారం మేరకు.. భాజపా జాతీయ కార్యవర్గ సమావేశం తెలంగాణపై రాజకీయ తీర్మానం చేయనుంది. ఉద్యమ నినాదాలు.. ఆశించిందేంటి.. రాష్ట్ర ఆవిర్భావం తర్వాత ఏం జరుగుతోంది అన్న విషయాలతో తీర్మానం చేయనున్నట్లు సమాచారం. ‘తెరాస ప్రభుత్వ పాలనలో ఉద్యమ ఆకాంక్షలు నెరవేరడం లేదని.. భాజపా అధికారంలోకి వస్తే ప్రజల ఆకాంక్షలకు అనుగుణంగా పాలన అందిస్తుంది’.. అంటూ తీర్మానం రూపొందిస్తున్నట్లు తెలిసింది.  జాతీయ ప్రధాన కార్యదర్శులతో శుక్రవారం రాత్రి నిర్వహించే సమావేశంలో జేపీ నడ్డా కార్యవర్గ సమావేశాల ఎజెండా, తీర్మానాల్ని ఖరారు చేస్తారు. కుటుంబ రాజకీయాలకు వ్యతిరేకంగానూ తీర్మానం చేసే అవకాశాలున్నట్లు తెలుస్తోంది.