మహిళలకు రక్షణ కల్పించడంలో తెరాస సర్కారు విఫలం: షర్మిల

పెన్‌పహాడ్‌, న్యూస్‌టుడే: మహిళలకు రక్షణ కల్పించడంలో తెరాస ప్రభుత్వం విఫలమైందని వైతెపా అధ్యక్షురాలు వైఎస్‌ షర్మిల అన్నారు. సూర్యాపేట జిల్లా కేంద్రం సమీపంలోని కుసుమవారిగూడెం, కాసరబాద క్రాస్‌రోడ్డు, జమునానగర్‌, తాళ్లఖమ్మంపహాడ్‌, పెన్‌పహాడ్‌ మండలం అనాజీపురం, అనంతారంలో ప్రజాప్రస్థాన పాదయాత్రను గురువారం కొనసాగించారు. ఈ సందర్భంగా ఆమె మాట్లాడుతూ ఎన్నికల సమయంలో ఇచ్చిన హామీలను సీఎం కేసీఆర్‌ గాలికొదిలేశారని విమర్శించారు. బంగారు తెలంగాణ చేస్తామంటూ బాధల తెలంగాణగా మార్చారని ఎద్దేవా చేశారు. కౌలు రైతులను ప్రభుత్వం చిన్నచూపు చూస్తుందన్నారు. వైతెపా అధికారంలోకి రాగానే రైతులు, కౌలురైతులకు చేయూతనందించి వ్యవసాయాన్ని పండుగ చేస్తామన్నారు.