తెరాస నుంచి మురళీయాదవ్‌ సస్పెన్షన్‌

మెదక్‌, న్యూస్‌టుడే: నర్సాపూర్‌ పురపాలక సంఘం అధ్యక్షుడు మురళీయాదవ్‌ను పార్టీ నుంచి సస్పెండ్‌ చేస్తున్నట్లు పద్మా దేవేందర్‌రెడ్డి ప్రకటించారు. శనివారం మెదక్‌లో ఆమె మాట్లాడారు. మురళీయాదవ్‌కు పార్టీలో సముచిత స్థానం కల్పించామని పేర్కొన్నారు. ఆయనకు గతంలో ఉమ్మడి మెదక్‌ జిల్లా పార్టీ అధ్యక్ష బాధ్యతలు, ప్రస్తుతం మున్సిపల్‌ ఛైర్మన్‌, ఆయన భార్య రాజమణికి ఉమ్మడి జడ్పీ ఛైర్‌పర్సన్‌ పదవిని పార్టీ కట్టబెట్టిందని వివరించారు. ఏదైనా సమస్య ఉంటే పార్టీలో అంతర్గతంగా చర్చించాలని, తమ దృష్టికి తీసుకురావాల్సిందని చెప్పారు. కానీ, పార్టీకి వ్యతిరేకంగా అనుచిత వ్యాఖ్యలు చేశారన్నారు. అధిష్ఠానం ఆదేశాల మేరకు ఆయనను సస్పెండ్‌ చేస్తూ నిర్ణయం తీసుకున్నట్లు తెలిపారు.