12 సంక్షేమ పథకాలను రద్దు చేసిన ప్రభుత్వం

తెదేపా నాయకులు దొన్నుదొర, ధారునాయక్‌

ఈనాడు డిజిటల్‌, అమరావతి : వైకాపా ప్రభుత్వం అధికారంలోకి వచ్చిన తర్వాత 12 గిరిజన సంక్షేమ పథకాలను రద్దు చేసిందని తెదేపా ఎస్టీ సెల్‌ రాష్ట్ర అధ్యక్షుడు దొన్నుదొర, ఎస్సీ కార్పొరేషన్‌ మాజీ ఛైర్మన్‌ ధారునాయక్‌ మండిపడ్డారు. రాష్ట్రంలో గిరిజన హక్కులను జగన్‌ ప్రభుత్వం కాలరాస్తోందని శనివారం ఓ ప్రకటనలో ఆరోపించారు. తెదేపా హయాంలో నిర్మించిన 81 గురుకులాలకు నాడు-నేడు పేరుతో రంగులేయడం తప్ప జగన్‌ చేసిందేమీ లేదని మండిపడ్డారు. ఈ నెల 9న తెదేపా కేంద్ర కార్యాలయంలో ప్రపంచ ఆదివాసీ దినోత్సవాన్ని నిర్వహించనున్నామని,  తెదేపా రాష్ట్ర అధ్యక్షుడు అచ్చెన్నాయుడు పాల్గొంటారని పేర్కొన్నారు.