రాష్ట్ర రాజకీయాల్లో నిర్ణయాత్మక శక్తి భాజపాదే

పార్టీ రాష్ట్ర అధ్యక్షుడు సోము వీర్రాజు

ఈనాడు డిజిటల్‌, అమరావతి: రాష్ట్ర రాజకీయాల్లో భాజపా నిర్ణయాత్మక శక్తిగా మారిందని ఆ పార్టీ రాష్ట్ర అధ్యక్షుడు సోము వీర్రాజు పేర్కొన్నారు. రాష్ట్రంలోని వివిధ ప్రాంతాల్లో భాజపా చేపట్టే ఉద్యమాలకు ప్రజల మద్దతుండటంతో పాటు పలు సమస్యలు పరిష్కారమయ్యాయని వెల్లడించారు. భాజపా ముఖ్యనేతలతో ఆయన ఆదివారం వీడియో కాన్ఫరెన్స్‌ నిర్వహించారు. ఈ సందర్భంగా ఆయన మాట్లాడుతూ.. ‘పార్టీ చేపట్టిన యువ సంఘర్షణ యాత్ర విజయవంతంగా కొనసాగుతోంది. యాత్రకు పలు జిల్లాల్లో ప్రజలు బ్రహ్మరథం పడుతున్నారు. ఇదే ఉత్సాహాన్ని కార్యకర్తలు కొనసాగించాలి. రాష్ట్రంలోని ప్రధాన ప్రతిపక్షం కంటే భాజపాకే ఆదరణ ఎక్కువ ఉంది. ప్రజాసమస్యలు పరిష్కారమయ్యే వరకు ఉద్యమాలు కొనసాగిస్తాం’ అని వెల్లడించారు.