మహారాష్ట్ర హోంమంత్రిగా ఫడణవీస్‌!

ఆగస్టు 15లోపు మంత్రిమండలి విస్తరించే అవకాశం

దిల్లీ: మహారాష్ట్ర సీఎం ఏక్‌నాథ్‌ శిందే వారంలోపు తన మంత్రిమండలిని విస్తరించే అవకాశాలు ఉన్నాయి. 15 మందిని ఆయన మంత్రులుగా తీసుకోనున్నారని సమాచారం. ప్రస్తుతం ఉపముఖ్యమంత్రిగా కొనసాగుతున్న దేవేంద్ర ఫడణవీస్‌ హోంశాఖ పగ్గాలు చేపట్టనున్నారని తెలుస్తోంది. మంత్రిమండలిపై కసరత్తు ఈ నెల 15లోపు కొలిక్కిరానుంది. శివసేన ఎమ్మెల్యేల తిరుగుబాటు నేపథ్యంలో ఉద్ధవ్‌ఠాక్రే రాజీనామా చేయడంతో జూన్‌ 30న శిందే, ఫడణవీస్‌లు మహారాష్ట్ర సీఎం, డిప్యూటీ సీఎంలుగా పదవీ ప్రమాణ స్వీకారం చేసిన సంగతి తెలిసిందే. అప్పటినుంచి వీరిద్దరితోనే మహారాష్ట్ర మంత్రిమండలి కొనసాగుతోంది.