ఆజాదీ కా అమృత్‌ మహోత్సవాల్లో ప్రవాసాంధ్రులు భాగస్వాములు కావాలి

సోము వీర్రాజు విజ్ఞప్తి

ఈనాడు, అమరావతి: ఆజాదీ కా అమృత్‌ మహోత్సవాల్లో భాగంగా భాజపా రాష్ట్ర శాఖ నిర్వహించే కార్యక్రమాల్లో అమెరికాలోని ప్రవాసాంధ్రులు కూడా భాగస్వాములు కావాలని అధ్యక్షుడు సోము వీర్రాజు కోరారు. అమెరికాలోని తెలుగు వారితో వీడియో కాన్ఫరెన్స్‌ ద్వారా సోమువీర్రాజు, ఇతర సీనియర్‌ నేతలు సమావేశమయ్యారు. ఈ సందర్భంగా ఆయన మాట్లాడుతూ రాష్ట్ర ప్రభుత్వ విధానాలవల్ల ప్రజలకు ఎదురవుతోన్న సమస్యలు, కేంద్ర నిధులతో ఏపీలో దేవాలయాలు, ఇతర రంగాల్లో జరుగుతోన్న అభివృద్ధి గురించి వివరించారు. దేవాలయాల పరిరక్షణ కోసం భాజపా రాష్ట్ర శాఖ కృషిచేస్తోందని పేర్కొన్నారు.