తెదేపా ఆధ్వర్యంలో ‘హర్‌ ఘర్‌ తిరంగా’

పార్టీ అధినేత చంద్రబాబు పిలుపు

ఈనాడు డిజిటల్‌, అమరావతి: దేశానికి స్వాతంత్య్రం వచ్చి 75 ఏళ్లు పూర్తికావస్తున్న సందర్భంగా ఈ నెల 13, 14, 15 తేదీల్లో తెదేపా కార్యకర్తలు వారి ఇళ్లపై జాతీయ జెండాను ఎగురవేయాలని ఆ పార్టీ అధినేత చంద్రబాబు పిలుపునిచ్చారు. ఆగస్టు 15న గుంటూరు నగరం.. స్తంభాలగరువులోని చేబ్రోలు హనుమయ్య ప్రాంగణంలో జరిగే ఆజాదీకా అమృత్‌ మహోత్సవాల్లో చంద్రబాబు పాల్గొననున్నారు. జెండా ఆవిష్కరణ అనంతరం బహిరంగ సభలో ఆయన ప్రసంగిస్తారు. ఈ కార్యక్రమానికి వచ్చేవారు తమ వాహనాలకు పార్టీ జెండాలు కాకుండా జాతీయ జెండాలు మాత్రమే కట్టుకురావాలని కార్యకర్తలకు సూచించారు. అందరూ ఆజాదీకా అమృత్‌ మహోత్సవాల్లో పాల్గొనాలని చంద్రబాబు కోరినట్లు తెదేపా గురువారం ఓ ప్రకటనలో తెలిపింది.