మునుగోడు ఉప ఎన్నికతోనే కేసీఆర్‌ ప్రభుత్వ పతనం ప్రారంభం

కోమటిరెడ్డి రాజగోపాల్‌రెడ్డి

మునుగోడు, న్యూస్‌టుడే: రాష్ట్రంలో అరాచక పాలన సాగిస్తున్న కేసీఆర్‌ ప్రభుత్వానికి మునుగోడు ఉప ఎన్నికతోనే పతనం ప్రారంభమైందని మాజీ ఎమ్మెల్యే కోమటిరెడ్డి రాజగోపాల్‌రెడ్డి అన్నారు. మునుగోడులో శుక్రవారం ఆయన విలేకరులతో మాట్లాడారు. ఎమ్మెల్యేగా ఉన్నప్పుడు నియోజకవర్గ సమస్యలపై చర్చించేందుకు వెళ్తే ముఖ్యమంత్రి అపాయింట్‌మెంట్‌ ఇవ్వలేదని తెలిపారు. ప్రగతిభవన్‌, ఫాంహౌస్‌లకు పరిమితమైన సీఎం తన రాజీనామాతో ప్రజల వద్దకు దిగి వస్తున్నారని చెప్పారు. ప్రభుత్వం 10 లక్షల మందికి కొత్త పింఛన్లు, ఉపాధి హామీ క్షేత్ర సహాయకులను విధుల్లోకి తీసుకోవడం, చేనేత కార్మికులకు బీమా సౌకర్యం తదితర చర్యలు చేపట్టిందన్నారు.మూడున్నర ఏళ్లుగా ఏమీ అభివృద్ధి చేయలేకపోయానని తెలిపారు. ఎన్నికలు వచ్చినచోటే ఈ ప్రభుత్వం అభివృద్ధి చేస్తోందని, అందుకే రాజీనామా చేశానని పేర్కొన్నారు.