భాజపాను ఓడించే గెలుపు గుర్రానికే మద్దతు

సీపీఎం రాష్ట్ర కార్యదర్శి తమ్మినేని

వైరా, న్యూస్‌టుడే: దేశానికే ప్రమాదకారిగా మారిన మతతత్వ భాజపాను ఓడించకుంటే పెను ప్రమాదం తప్పదని సీపీఎం రాష్ట్ర కార్యదర్శి తమ్మినేని వీరభద్రం హెచ్చరించారు. ఖమ్మం జిల్లా వైరా మండలంలోని ముసలిమడుగులో ఆదివారం విలేకరుల సమావేశంలో మాట్లాడారు. ‘‘మునుగోడులో భాజపాను ఓడించేందుకు ఏ పార్టీతోనైనా పొత్తుకు సిద్ధం. ప్రస్తుతానికి భాజపాను ఓడించే శక్తి తెరాసకు ఉంది. కానీ రూ.వందల కోట్ల మేర ప్రలోభాలు జరుగుతున్న నేపథ్యంలో పరిణామాలెలా ఉంటాయో చూడాల్సి ఉంది. తర్వాతి పరిణామాలను బట్టి భాజపాను ఓడించే శక్తి ఉన్న గెలుపు గుర్రానికే మద్దతు ఇస్తాం’’ అని అన్నారు. ఒకప్పుడు డబ్బు ఎరచూపి పార్టీ ఫిరాయింపులు చేసేవారని.. భాజపా మాత్రం ఈడీ, సీబీఐలను అడ్డుపెట్టుకొని ప్రభుత్వాలను కూలదోస్తోందని విమర్శించారు. భాజపాను ఎదుర్కోవడంలో కేసీఆర్‌ చేస్తున్న పోరాటానికి మద్దతు పలుకుతున్నామని చెప్పారు. ఇచ్చిన హామీలను ఆయన నిలబెట్టుకోకుంటే రాష్ట్రంలో కమలదళం బలపడేందుకు కారణమవుతారన్నారు. కేసీఆర్‌ ఇప్పటికైనా చేసిన తప్పులను తెలుసుకోవాలని సూచించారు.