జగన్‌ పాలనలో.. తెలంగాణకు వలసపోయే పరిస్థితి వచ్చింది

వైకాపా ఎంపీ రఘురామకృష్ణరాజు

ఈనాడు, దిల్లీ: దేశ స్వాతంత్య్ర వజ్రోత్సవాల వేళ ఆంధ్రప్రదేశ్‌లో అధ్వాన పరిస్థితులు నెలకొన్నాయని వైకాపా ఎంపీ రఘురామకృష్ణరాజు ఆవేదన వ్యక్తం చేశారు. సీఆర్‌డీఏ వేలంలో కేవలం మూడు ప్లాట్లకు మాత్రమే బిడ్లు వచ్చాయంటే.. రాష్ట్రంలో పరిస్థితి అర్థమవుతుందన్నారు. దిల్లీలో సోమవారం ఆయన విలేకరులతో మాట్లాడారు. సీఆర్‌డీఏ వ్యాపార ప్రకటన పరిశీలిస్తే రాష్ట్ర ముఖచిత్రం స్పష్టమవుతుందన్నారు. రాష్ట్రంలో నెలకొన్న పరిస్థితులతో ప్రజలు తెలంగాణకు వలస పోయేందుకు సిద్ధంగా ఉన్నారన్నారు. స్వాతంత్య్ర దినోత్సవ ప్రసంగంలో ముఖ్యమంత్రి జగన్‌మోహన్‌రెడ్డి అన్నీ అబద్ధాలే చెప్పారని ఆయన విమర్శించారు. నగ్న వీడియో ఎంపీ మాధవ్‌దేనని ప్రతిష్టాత్మక పరిశోధన సంస్థ తేల్చి చెప్పిన తర్వాత కూడా ఈ సన్మానాలు ఏమిటని ప్రశ్నించారు.