వరద బాధితులను ఆదుకోవడంలో ప్రభుత్వం విఫలం: శైలజానాథ్‌

ఈనాడు, అమరావతి: వరద బాధితులను ఆదుకోవడంలో రాష్ట్ర ప్రభుత్వం విఫలమైందని ఏపీపీసీసీ అధ్యక్షుడు శైలజానాథ్‌ ఆరోపించారు. వరద ప్రాంతాల్లో ముఖ్యమంత్రి జగన్‌మోహన్‌రెడ్డి తూతూమంత్రంగా పర్యటించి చేతులు దులిపేసుకున్నారని బుధవారం ఒక ప్రకటనలో విమర్శించారు. ‘గోదావరి వరద తగ్గినట్లే తగ్గి మళ్లీ రోజుల వ్యవధిలోనే పెరుగుతుండటంతో కుక్కునూరు, వేలేరుపాడు మండలాల్లో వేలాది మంది కంటి మీద కునుకు లేకుండా కాలం వెళ్లదీస్తున్నారు. 30 గ్రామాలు జల దిగ్బంధంలోనే ఉన్నాయి. భద్రాచలం వద్ద వరద 35 అడుగులకు చేరుకోగానే మండలంలోని యడవల్లి-బోళ్లపల్లి గ్రామాల మధ్యలోని ఎద్దువాగు వంతెన నీట మునిగి ఆవలి వైపున ఉన్న 17 గ్రామాలకు రాకపోకలు నిలిచాయి. వరదలతో తీవ్ర ఇబ్బందులు ఎదుర్కొంటున్న బాధితులను ప్రభుత్వం వెంటనే ఆదుకోవాలి’ అని డిమాండ్‌ చేశారు.