‘కుప్పం’ తెదేపా నేతలకు హైకోర్టులో ఊరట

బెయిలు మంజూరు చేసిన న్యాయస్థానం

ఈనాడు, అమరావతి: చిత్తూరు జిల్లా కుప్పం నియోజకవర్గం తెదేపా నేతలకు హైకోర్టులో ఊరట లభించింది. రామకుప్పం పోలీసులు తెదేపా నాయకులపై హత్యాయత్నం తదితర తీవ్ర సెక్షన్లు నమోదు చేసి అరెస్ట్‌ చేసిన కేసులో షరతులతో కూడిన బెయిలు మంజూరు చేసింది. బెయిలు పొందిన వారిలో తెదేపా మాజీ ఎమ్మెల్సీ గౌనివారి శ్రీనివాసులు, మాజీ జడ్పీటీసీ ఎస్‌.రాజ్‌కుమార్‌, నాయకులు టి.మునస్వామి, మునెప్ప, మంజునాథ్‌, ఎం.సుబ్రమణ్యం(సుబ్బు), ముకేష్‌కుమార్‌, ఆర్‌.సుబ్రమణ్యం మణి ఉన్నారు. రూ.25 వేలతో రెండు పూచీకత్తులు సమర్పించాలని, అభియోగపత్రం దాఖలు చేసేంత వరకు సంబంధిత స్టేషన్‌ హౌజ్‌ అధికారి ముందు నెలలో రెండు, నాలుగో శనివారం హాజరు కావాలని షరతు విధించింది. హైకోర్టు న్యాయమూర్తి జస్టిస్‌ చీమలపాటి రవి శుక్రవారం ఈ మేరకు ఆదేశాలిచ్చారు. పిటిషనర్ల తరఫున సీనియర్‌ న్యాయవాది పోసాని వెంకటేశ్వర్లు, న్యాయవాది గింజుపల్లి సుబ్బారావు వాదనలు వినిపించారు. రాజకీయకక్షతో పిటిషనర్లపై తప్పుడు కేసు నమోదు చేశారన్నారు. తెదేపా అధ్యక్షుడు చంద్రబాబునాయుడు పర్యటన సందర్భంగా ఇటీవల రామకుప్పం మండలం కొల్లుపల్లి గ్రామంలో తెదేపా, వైకాపా శ్రేణుల మధ్య ఘర్షణ చోటు చేసుకుంది. ఈ విషయమై రామకుప్పం పోలీసులు తెదేపా నేతలపై పలు కేసులు పెట్టి అరెస్ట్‌ చేశారు. ఆ కేసుల్లో తమకు బెయిలు మంజూరు చేయాలని తెదేపా నేతలు హైకోర్టులో బెయిలు పిటిషన్లు దాఖలు చేశారు.