వైకాపా నేతలు దోపిడీదారులు

భాజపా నాయకుడు సునీల్‌ దేవధర్‌

అనకాపల్లి, న్యూస్‌టుడే: వైకాపాలో ఉన్న నాయకులంతా దోపిడీదారులని భాజపా నాయకుడు సునీల్‌ దేవధర్‌ విమర్శించారు. అనకాపల్లి జిల్లా కేంద్రంలో శనివారం పార్టీ జిల్లా అధ్యక్షుడు డాక్టర్‌ గండి వెంకట సత్యనారాయణ అధ్యక్షతన జరిగిన ప్రజాపోరు కార్యక్రమంలో మాట్లాడారు. వైకాపా ప్రభుత్వం చేస్తున్న దోపిడీలకు అడ్డు లేకుండా పోతోందన్నారు. ఇసుకను అమ్ముకుంటున్నారని తెలిపారు. పనులు చేసిన గుత్తేదారులకు డబ్బు చెల్లించడం లేదని, ఈ కారణంగా పనులు చేయడానికి వారు ముందుకు రావడం లేదని, దాంతో కార్మికులు ఇబ్బందులు పడుతున్నారని వివరించారు. ‘సీఎం జగన్‌ హిందూ వ్యతిరేక కార్యక్రమాలు చేస్తున్నారు. రాష్ట్రంలో మత మార్పిడిని ప్రోత్సహిస్తున్నారు. అందరినీ క్రైస్తవులుగా మార్చేయాలన్నదే జగన్‌ ధ్యేయం. దీన్ని భాజపా చూస్తూ ఊరుకోదు’ అని పేర్కొన్నారు. ప్రజాసామ్య దేశంలో ఏ పార్టీకీ శాశ్వత అధ్యక్షులు ఉండరని, జగన్‌ మాత్రం తానే శాశ్వత అధ్యక్షుడిని అంటూ తీర్మానాలు చేయించుకోవడం సిగ్గు చేటన్నారు. అనకాపల్లిలో కనీసం కంపోస్టు యార్డును ఏర్పాటు చేయలేని దుస్థితిలో మంత్రి అమర్‌నాథ్‌ ఉన్నారని విమర్శించారు. వచ్చే ఎన్నికల్లో జనసేనతో మాత్రమే పొత్తు ఉంటుందని పేర్కొన్నారు.