పేదలకు మేలు చేసింది కాంగ్రెస్సే

పీసీసీ అధ్యక్షుడు రేవంత్‌రెడ్డి

సంస్థాన్‌ నారాయణపురం, న్యూస్‌టుడే: అణగారిన వర్గాల ప్రజలు ఆత్మగౌరవంతో జీవించాలని ఇళ్లు, భూములు పంచింది కాంగ్రెస్‌ పార్టీయేనని పీసీసీ అధ్యక్షుడు రేవంత్‌రెడ్డి అన్నారు. ఆదివారం యాదాద్రి భువనగిరి జిల్లా సంస్థాన్‌ నారాయణపురం మండలం జనగాం, వాయిళ్లపల్లి, బోటిమీదితండాలో నిర్వహించిన ‘మన మునుగోడు- మన కాంగ్రెస్‌’ రచ్చబండ ఎన్నికల ప్రచారంలో ఆయన మాట్లాడారు. రాచకొండ అడవిలోని గిరిజనులను ఆదుకోవాలని ఆనాడు కాంగ్రెస్‌ రెండువేల ఎకరాల పోడు భూములను వారికి పంచిందన్నారు. కోమటిరెడ్డి రాజగోపాల్‌రెడ్డిని కాంగ్రెస్‌ పార్టీ అనేకసార్లు గెలిపిస్తే వెన్నుపోటు పొడిచారన్నారు. ఆడబిడ్డ పాల్వాయి స్రవంతికి ఉపఎన్నికలో ఓ అవకాశం ఇవ్వాలని కోరారు. కమ్యూనిస్టులు అమ్ముడుపోయారని సర్వేల్‌ గ్రామంలో ఇటీవల తాను మాట్లాడినట్టు సీపీఐ నాయకుడు కూనంనేని సాంబశివరావు తప్పుడు ప్రచారం చేస్తున్నారని ఆరోపించారు. తానలా మాట్లాడినట్టు నిరూపిస్తే ముక్కు నేలకు రాస్తానని సవాల్‌ విసిరారు.