అది దోపిడీదారుల సర్వసభ్య సమావేశం

తెదేపా ఎమ్మెల్సీ మంతెన సత్యనారాయణరాజు

ఈనాడు-అమరావతి: ఉత్తరాంధ్రలో మూడున్నరేళ్లుగా దోచుకున్న దాంట్లో వాటాలు పంచుకునేందుకే వైకాపా నేతలు విశాఖపట్నంలో సమావేశమయ్యారని తెదేపా ఎమ్మెల్సీ మంతెన సత్యనారాయణరాజు విమర్శించారు. ‘విశాఖపట్నంలో జరిగింది రౌండ్‌టేబుల్‌ సమావేశం కాదు... దోపిడీదారుల సర్వసభ్య సమావేశం’ అని ఎద్దేవా చేశారు. ‘రాష్ట్ర ప్రజలు, అన్ని పార్టీలు, వైకాపా నేతలు అమరావతినే రాజధానిగా కావాలంటున్నారు. మంత్రి గుడివాడ అమర్నాథ్‌ తన పదవి పోతుందనే భయంతో వణికిపోతున్నారు. జగన్‌రెడ్డికి భయపడి కొందరు వైకాపా నేతలు మూడు రాజధానులకు మద్దతిస్తున్నారు. తమ స్వార్థం కోసం ప్రజల మధ్య ప్రాంతీయ చిచ్చు పెట్టాలన్న జగన్‌రెడ్డి కుట్రలో భాగస్వాములైన నేతలు చరిత్రలో ఉత్తరాంధ్ర ద్రోహులుగా మిగిలిపోతారు’ అని ఒక ప్రకటనలో ధ్వజమెత్తారు.