Seediri Appalaraju: కాళ్ల బేరానికైనా వెళ్లి ఎమ్మెల్సీ ఎన్నికల్లో గెలుద్దాం: మంత్రి అప్పలరాజు

అరసవల్లి, న్యూస్‌టుడే: అవసరమైతే కాళ్లబేరానికైనా వెళ్లి రానున్న పట్టభద్రుల ఎమ్మెల్సీ ఎన్నికలో గెలుద్దామని మంత్రి సీదిరి అప్పలరాజు వ్యాఖ్యానించారు. శ్రీకాకుళం జిల్లా కేంద్రంలోని వైకాపా కార్యాలయంలో సోమవారం నిర్వహించిన పార్టీ నాయకులు, కార్యకర్తల సమావేశంలో ఆయన పాల్గొన్నారు. ఈ సందర్భంగా మాట్లాడుతూ ఉత్తరాంధ్ర పట్టభద్రుల ఎమ్మెల్సీ అభ్యర్థిగా పార్టీ తరఫున సీతంరాజు సుధాకర్‌ను ముఖ్యమంత్రి వైఎస్‌ జగన్‌మోహన్‌రెడ్డి నియమించారన్నారు. ఈ నేపథ్యంలో తప్పనిసరిగా గెలవాల్సిందే అన్నారు. ఇందుకోసం అవసరమైతే కాళ్లబేరానికైనా వెళదామన్నారు. మరో మంత్రి ధర్మాన ప్రసాదరావు మాట్లాడుతూ ఈ ఎన్నికల్లో పార్టీ అభ్యర్థిని గెలిపించకపోతే వైకాపాకు నష్టమని అభిప్రాయపడ్డారు. వైకాపా జిల్లా అధ్యక్షుడు, నరసన్నపేట ఎమ్మెల్యే ధర్మాన కృష్ణదాసు మాట్లాడుతూ ఈ ఎన్నికల్లో కీలకంగా పనిచేయాలని కార్యకర్తలకు సూచించారు.