అలజడి సృష్టించడానికే రైతుల పాదయాత్ర: మంత్రి రోజా

యర్రగొండపాలెం, న్యూస్‌టుడే: రాష్ట్రంలో అలజడి సృష్టించడానికే కొంతమంది అమరావతి రైతుల పేరుతో పాదయాత్ర చేస్తున్నారని మంత్రి రోజా ఆరోపించారు. ప్రకాశం జిల్లా యర్రగొండపాలెంలో సోమవారం వైఎస్సార్‌ క్రీడా వికాస కేంద్ర ప్రారంభోత్సవానికి హాజరైన ఆమె మాట్లాడారు. 29 గ్రామాల కోసం 26 జిల్లాల అభివృద్ధిని ఫణంగా పెట్టేందుకు ప్రభుత్వం సిద్ధంగా లేదన్నారు. అన్ని ప్రాంతాల అభివృద్ధి కోసమే 3 రాజధానులను ఏర్పాటు చేయనున్నట్లు పేర్కొన్నారు. ఎన్నో కోట్ల మంది గుండెలను కాపాడిన వైఎస్సార్‌ పేరును యూనివర్సిటీకి పెట్టడం సమంజసమేనని సమర్ధించారు. చంద్రబాబు ఎన్టీఆర్‌ను మోసం చేసినా కుటుంబసభ్యులు పట్టించుకోలేదని, వారే అండగా ఉంటే ఎన్టీఆర్‌ ప్రధాని అయ్యేవారని రోజా విమర్శించారు.