ఏపీని మూడు రాష్ట్రాలు చేసుకొని.. ముగ్గురు ముఖ్యమంత్రులు అవ్వండి

తెలంగాణ ఎమ్మెల్యే జగ్గారెడ్డి ఎద్దేవా

హైదరాబాద్‌, న్యూస్‌టుడే: ఆంధ్రప్రదేశ్‌ను మూడు రాజధానులు కాకుంటే మూడు రాష్ట్రాలు చేసుకుని.. జగన్‌, షర్మిల, విజయసాయిరెడ్డిలు ముగ్గురు ముఖ్యమంత్రులు కావాలని తెలంగాణ కాంగ్రెస్‌ ఎమ్మెల్యే జగ్గారెడ్డి ఎద్దేవా చేశారు. జగన్‌కు చెప్పి షర్మిలను సీఎం చేయాలని వై.ఎస్‌.విజయమ్మకు సలహా ఇస్తున్నానని అన్నారు. ‘‘మీ కుటుంబం అంతా మోదీ దగ్గర కూర్చుని మూడు రాష్ట్రాలు చేసుకోండి. కానీ, మీ ఇంటి పంచాయితీ ఇక్కడి(తెలంగాణ) జనానికి చుట్టకండి’’ అని హితవు పలికారు. మంత్రి కేటీఆర్‌కు కోవర్టు అంటూ తనపై వైతెపా అధ్యక్షురాలు వై.ఎస్‌.షర్మిల చేసిన వ్యాఖ్యలను జగ్గారెడ్డి ఖండించారు. ఆమె భాజపా ఏజెంటని ఆరోపించారు. మంగళవారం అసెంబ్లీ మీడియాహాలులో ఆయన విలేకరుల సమావేశంలో మాట్లాడారు. ‘‘నా దమ్ము చూసి వై.ఎస్‌.రాజశేఖరరెడ్డి కాంగ్రెస్‌లోకి పిలిచారు. ఆయనకు నచ్చిన నేను షర్మిలకు నచ్చలేదంటే ఆమెకు రాజకీయ పరిజ్ఞానం లేదని అర్థం. ఆమె నోరు అదుపులో పెట్టుకోకపోతే అన్ని విషయాలు బయటపెడతా’’ అని హెచ్చరించారు.