బొత్సకు పాదయాత్రను ఆపే దమ్ముందా?: సీపీఐ

ఈనాడు, అమరావతి: ‘అమరావతి రైతుల పాదయాత్రను ఆపే దమ్ము మంత్రి బొత్స సత్యనారాయణకు ఉందా? పాదయాత్రకు జగన్‌ ప్రభుత్వం ఎలాంటి ఇబ్బంది తలపెట్టినా తీవ్ర పరిణామాలు ఎదుర్కోవాల్సి ఉంటుంది’ అని సీపీఐ రాష్ట్ర కార్యదర్శి రామకృష్ణ హెచ్చరించారు. ‘అమరావతి రైతులను రెచ్చగొట్టేలా మంత్రి చేసిన వ్యాఖ్యలను తీవ్రంగా ఖండిస్తున్నాం. రైతులు రోడ్డెక్కడానికి ప్రధాన కారణం సీఎం జగన్‌ మాట తప్పడమే. గతంలోనూ అమరావతి ఉద్యమానికి పోటీగా వైకాపా దీక్షలు పెట్టించింది. కూలీలను తీసుకొచ్చి వారికి డబ్బులిచ్చి, దీక్షల్లో కూర్చోబెట్టారు. అమరావతి రైతుల పాదయాత్రకు ప్రజల నుంచి అనూహ్య మద్దతు లభిస్తుంటే ఓర్వలేక వైకాపా మంత్రులు రెచ్చగొట్టేలా ప్రవర్తిస్తున్నారు. పలుచోట్ల పోలీసులను ప్రయోగించి, పాదయాత్రను ఆపాలనే కుట్రలు చేస్తున్నారు. కమీషన్లకు కక్కుర్తిపడి గంగవరం పోర్టును అదానీ కంపెనీకి ప్రభుత్వం అప్పనంగా అప్పగించింది. అదానీకి ఊడిగం చేస్తున్న పాలకులు తన చేతగాని తనాన్ని కప్పిపుచ్చుకునేందుకు విశాఖను ముంబయిలా చేస్తామని చెబుతున్నారు. మూడు రాజధానులనేది ప్రజలను మధ్యపెట్టేందుకు జగన్‌ ప్రభుత్వం చేస్తున్న కుట్ర మాత్రమే’ అని విమర్శించారు.