కేరళ నుంచి తమిళనాడులోకి..

నేడు ప్రవేశించనున్న భారత్‌ జోడో యాత్ర

మలప్పురం, వయనాడ్‌: కాంగ్రెస్‌ అగ్రనేత రాహుల్‌ గాంధీ నేతృత్వంలో సాగుతున్న భారత్‌ జోడో యాత్ర గురువారం కేరళ నుంచి తమిళనాడులోకి ప్రవేశించనుంది. ఈ నెల 10న కేరళలోకి యాత్ర ప్రవేశించిన సంగతి తెలిసిందే. గురువారం కూడా ఆ రాష్ట్రంలో పాదయాత్ర కొంతదూరం సాగనుంది. దాన్ని కూడా కలుపుకొంటే మొత్తంగా కేరళలో ఏడు జిల్లాల్లో 440 కిలోమీటర్ల మేర నడిచినట్లవుతుందని ఏఐసీసీ ప్రధాన కార్యదర్శి జైరాం రమేశ్‌ తెలిపారు. ప్రముఖ స్వాతంత్య్ర సమరయోధుడు భగత్‌సింగ్‌ జయంతిని పురస్కరించుకొని యాత్ర సందర్భంగా ఆయనకు రాహుల్‌ నివాళులర్పించారు.