అమరావతి రైతులపై సీఎం జగన్‌ కక్ష కట్టారు

ఓబీసీ మోర్చా జాతీయ అధ్యక్షుడు లక్ష్మణ్‌ విమర్శ

తిరుపతి(గాంధీరోడ్డు), న్యూస్‌టుడే: మూడు రాజధానుల పేరుతో సీఎం జగన్‌ ప్రజలను మభ్యపెడుతూ అమరావతిని అటకెక్కించారని భాజపా ఓబీసీ మోర్చా జాతీయ అధ్యక్షుడు లక్ష్మణ్‌ విమర్శించారు. తిరుపతిలోని ఓ ప్రైవేట్‌ హోటల్లో గురువారం ఆయన విలేకరులతో మాట్లాడుతూ... అమరావతి రైతులపై జగన్‌ కక్ష కట్టారని ఆరోపించారు. రాష్ట్రంలో ఇసుక, ఎర్రచందనం, ఖనిజాలు, ప్రకృతి సంపద... నిలువు దోపిడీకి గురవుతున్నాయన్నారు. జగన్‌ వైఖరి కారణంగా విభజన చట్టాలు అమలు కావడం లేదని, కేంద్ర నిధులను వైకాపా పథకాలకు మళ్లిస్తున్నారని మండిపడ్డారు. అంతకుముందు సేవా పక్షోత్సవాల్లో భాగంగా రుయా ఆసుపత్రి దగ్గర అన్నదానం చేశారు.