రాజస్థాన్‌ ప్రజలతోనే ఉంటా: గహ్లోత్‌

జైపుర్‌: తుదిశ్వాస వరకు రాజస్థాన్‌ ప్రజలతోనే ఉంటానని ముఖ్యమంత్రి అశోక్‌ గహ్లోత్‌ చెప్పారు. రాష్ట్ర తదుపరి బడ్జెట్‌ కోసం ప్రజలు నేరుగా తనకు సలహాలు పంపాలని కోరడం ద్వారా తాను సీఎం పదవిలో కొనసాగబోతున్నట్లు సంకేతాలిచ్చారు. కాంగ్రెస్‌ సర్కారు ఐదేళ్లూ పూర్తి చేసుకుంటుందని చెప్పారు. శుక్రవారం రాత్రి సిరోహీ జిల్లాలోని అబూరోడ్‌ వద్ద బహిరంగ సభాస్థలికి ఆలస్యంగా వచ్చిన ప్రధాని.. మోకాలిపై మూడుసార్లు వంగి అక్కడి ప్రజలకు క్షమాపణలు చెప్పడాన్ని గహ్లోత్‌ ప్రస్తావిస్తూ తనకంటే వినయం ఉన్న వ్యక్తిగా కనిపించేందుకు మోదీ ప్రయత్నిస్తున్నారని ఎద్దేవా చేశారు. చిన్నతనం నుంచి తాను అత్యంత వినయశీలిననీ, ఈ విషయంలో మోదీ పోటీ పడలేరని అన్నారు.