బహుజనుల ఆత్మాభిమానాన్ని దెబ్బతీస్తున్న అధికారులు

ప్రభుత్వమే బీపీ మండల్‌ విగ్రహాన్ని ఏర్పాటు చేయాలి

జై భీమ్‌ భారత్‌ పార్టీ డిమాండ్‌

ఈనాడు, అమరావతి: బీపీ మండల్‌ విగ్రహ పైలాన్‌ను ధ్వంసం చేయడం ద్వారా గుంటూరు నగరపాలక సంస్థ అధికారులు.. బహుజనుల ఆత్మభిమానాన్ని దెబ్బ తీశారని జై భీమ్‌ భారత్‌ పార్టీ అధ్యక్షుడు జడ శ్రవణ్‌కుమార్‌, అధికార ప్రతినిధి వై.కొండలరావు అన్నారు. అధికారుల చర్యలను తీవ్రంగా ఖండిస్తున్నట్లు శనివారం ఒక ప్రకటనలో వారు పేర్కొన్నారు. ‘విగ్రహ స్థాపన అనుమతుల కోసం రాష్ట్ర బీసీ సంఘం గత ఆరు నెలలుగా నిరీక్షిస్తూ...చివరకు అధికార పార్టీలోని బలహీనవర్గాలకు చెందిన ప్రజాప్రతినిధుల సమక్షంలో భూమి పూజ చేసి పైలాన్‌ నిర్మించడం జరిగింది. గుంటూరు నగరపాలక సంస్థ అధికారులు ఎలాంటి నోటీసులు ఇవ్వకుండా...ఏకపక్షంగా గత నెల 28న పైలాన్‌ను ధ్వంసం చేయడం అన్యాయం. దీనికి ప్రభుత్వం బాధ్యత వహించి అదే ప్రాంతంలో బీపీ మండల్‌ విగ్రహాన్ని ప్రభుత్వ నిధులతో ఏర్పాటు చేసి మూడు నెలల్లో ఆవిష్కరించాలి’ అని డిమాండ్‌చేశారు.