ఆంధ్రప్రదేశ్‌లో జగన్‌ నియంత పాలన

తెదేపా తెలంగాణ నేతలు బక్కని, రావుల

ఈనాడు, హైదరాబాద్‌: తెలుగుదేశం పార్టీ యువ నాయకుడు చింతకాయల విజయ్‌ హైదరాబాద్‌లో ఉంటున్న నివాసంపై ఏపీ సీఐడీ పోలీసులు దాడి చేయడాన్ని తెదేపా తెలంగాణ రాష్ట్ర అధ్యక్షుడు బక్కని నర్సింహులు, పొలిట్‌బ్యూరో సభ్యుడు రావుల చంద్రశేఖరరెడ్డి శనివారం ఒక ప్రకటనలో ఖండించారు. ఆంధ్రప్రదేశ్‌లో వైకాపా ప్రభుత్వ నిర్బంధకాండకు ఇది ప్రత్యక్ష సాక్ష్యమని పేర్కొన్నారు. విజయ్‌ నివాసంలో చివరికి పసిపిల్లలను కూడా భయభ్రాంతులకు గురిచేయడం హేయమని అన్నారు. ప్రశ్నించే వారిపై తప్పుడు కేసులు, అక్రమ నిర్బంధాలతో ఆంధ్రప్రదేశ్‌లో జగన్‌ నియంత పాలన సాగిస్తూ హిట్లర్‌ను మించిపోయారని విమర్శించారు.