విజయనగరంలో లోక్‌సత్తా ఆవిర్భావ దినోత్సవం

విజయనగరం గంటస్తంభం, న్యూస్‌టుడే: ప్రజల జీవితాల్లో మార్పు రావాలంటే.. రాజకీయాలు మారాల్సిన అవసరం ఉందన్న ఆలోచనతోనే డాక్టర్‌ జయప్రకాష్‌ నారాయణ లోక్‌సత్తాను స్థాపించారని ఆ పార్టీ రాష్ట్ర అధ్యక్షుడు భీశెట్టి బాబ్జీ తెలిపారు. సోమవారం లోక్‌సత్తా పార్టీ 16వ ఆవిర్భావ దినోత్సవాన్ని విజయనగరంలోని కార్యాలయంలో నిర్వహించారు. ఈ సందర్భంగా జెండా ఎగురవేసి గౌరవ వందనం చేశారు. దేశంలో మౌలిక మార్పుల కోసం జేపీ పడుతున్న తపనను నేటి తరం యువత గుర్తించాలని పిలుపునిచ్చారు. కార్యక్రమంలో పార్టీ ప్రతినిధులు నాగభూషణం, తాట్రాజు రాజారావు, రాజు, మొల్లేటి చిన్నారావు తదితరులు పాల్గొన్నారు.