కేంద్ర బలగాల పర్యవేక్షణలో ఉపఎన్నిక నిర్వహించాలి

ఎన్నికల సంఘానికి భాజపా వినతిపత్రం

ఈనాడు, హైదరాబాద్‌: మునుగోడు నియోజకవర్గంలో కేంద్ర బలగాల పర్యవేక్షణలో ఉప ఎన్నిక నిర్వహించాలని భాజపా.. ఎన్నికల సంఘాన్ని కోరింది. పార్టీ జాతీయ కార్యవర్గ సభ్యుడు ఎన్‌.ఇంద్రసేనారెడ్డి ఆధ్వర్యంలో నాయకులు మంగళవారం ఎన్నికల సంఘం రాష్ట్ర ముఖ్య ఎన్నికల అధికారి వికాస్‌రాజ్‌ను కలిసి వినతిపత్రం సమర్పించారు. ఉప ఎన్నిక దృష్ట్యా పార్టీ కార్యకర్తలపై పోలీసులు తప్పుడు కేసులు బనాయిస్తున్నారని అందులో పేర్కొన్నారు. ‘‘ఓటర్లను ప్రలోభాలకు గురి చేసేందుకు పోలీసు వాహనాలు, అంబులెన్స్‌ల ద్వారా డబ్బు తరలించే అవకాశం ఉంది. అడ్డుకట్ట వేయాలంటే కేంద్ర బలగాలను రంగంలోకి దింపాలి’’ అని వినతిపత్రంలో పేర్కొన్నారు. కార్యక్రమంలో దుగ్యాల ప్రదీప్‌కుమార్‌, డాక్టర్‌ ఎస్‌.ప్రభాకర్‌రెడ్డి,  కె.ఆంథోనిరెడ్డి, సోమంచి వెంకటేశ్వర్లు పాల్గొన్నారు.