రాజకీయలబ్ధి ఉన్నప్పుడే స్పందిస్తారా?

వాసిరెడ్డి పద్మకు అనిత సూటి ప్రశ్న

ఈనాడు-అమరావతి: రాజకీయలబ్ధి ఉన్నప్పుడే మహిళా కమిషన్‌ ఛైర్‌పర్సన్‌ వాసిరెడ్డి పద్మ స్పందిస్తారా? అని రాష్ట్ర తెలుగు మహిళ అధ్యక్షురాలు వంగలపూడి అనిత ట్విటర్‌ వేదికగా ప్రశ్నించారు. ఎక్కడెక్కడ వైకాపానకు రాజకీయంగా ఉపయోగపడుతుందో అక్కడ మాత్రమే బయటకు వచ్చి రాజకీయ విమర్శలు చేయాలని నిర్ణయించుకున్నారా అని నిలదీశారు. ‘వైకాపా అధికారంలోకి వచ్చాక ఉమ్మడి అనంతపురం జిల్లాలో దాదాపు 40 వరకు అఘాయిత్యాలు జరిగాయి. నిందితుల్లో కొందరు వాలంటీర్లు, వైకాపా నాయకులు ఉన్నారు. ఇటీవల స్థానిక సీఐ ఒక మహిళను దారుణంగా కొడితే మీరు నోరు మొదపలేదు. స్నేహలత అనే ఎస్సీ యువతిని చంపి కిరాతకంగా కాల్చినప్పుడు, తేజస్విని అనే ఫార్మసీ విద్యార్థినిని గ్యాంగ్‌ రేప్‌ చేసినప్పుడు, ఒక మహిళతో అసభ్యంగా ప్రవర్తించిన ఎంపీ మాధవ్‌ విషయంలో మీరు ఎక్కడున్నారు? వైకాపా వాళ్లు అఘాయిత్యాలు చేసినప్పుడు అజ్ఞాతంలోకి వెళ్లిపోతారు. ఇతరుల గురించి ఏమైనా దొరుకుతుందా అంటే ఒంటి కాలి మీద లేచి వస్తారు? నిష్పాక్షికంగా, రాగద్వేషాలకు అతీతంగా విధులు నిర్వర్తించడం అంటే ఇదేనా? మీకు మనస్సాక్షి ఉంటే ప్రశ్నించుకోండి. అందరు మహిళలను సమానంగా చూసి సమన్యాయం చేయండి’ అని అనిత పేర్కొన్నారు.