సమయం వచ్చినప్పుడు రాజకీయాలపై నిర్ణయం: రఘువీరా

మడకశిర, మడకశిర గ్రామీణం, న్యూస్‌టుడే: ‘గతంలో తీసుకున్న నిర్ణయం ప్రకారం ప్రస్తుతం రాజకీయాలకు దూరంగా ఉన్నాను. ఆ సమయం వచ్చినప్పుడు.. ఇంతకుముందు నాతో కలిసి అడుగులు వేసిన వారందరితో చర్చించి తగు నిర్ణయం తీసుకుంటాను’ అని మాజీ మంత్రి ఎన్‌.రఘువీరారెడ్డి తెలిపారు. శ్రీసత్యసాయి జిల్లా మడకశిర మండలం నీలకంఠాపురంలో శుక్రవారం గోవిందాపురం, జీవీపాళ్యం గ్రామస్థులతో ఆయన సమావేశమై, అనంతరం విలేకర్లతో మాట్లాడారు. రాహుల్‌గాంధీ చేపట్టిన భారత్‌ జోడో యాత్ర ఈ నెల 18న కర్నూలు జిల్లాలో ప్రవేశించనుంది. యాత్ర దిగ్విజయంగా కొనసాగాలని ఆకాంక్షిస్తూ నీలకంఠేశ్వరస్వామికి ప్రత్యేక పూజలు చేసి, తీర్థ ప్రసాదాలు, వస్త్రాన్ని రాహుల్‌గాంధీకి ఇవ్వనున్నట్లు రఘువీరారెడ్డి చెప్పారు.