విశాఖలో రాజధానికి అడ్డుపడే వారిని రాజకీయంగా చితక్కొట్టండి

మన పీక కోయడానికి అరసవల్లి వస్తారంట

రెవెన్యూశాఖ మంత్రి ధర్మాన ప్రసాదరావు

అరసవల్లి, గార, న్యూస్‌టుడే: విశాఖపట్నంలో రాజధాని ఏర్పాటుకు అడ్డుపడే వారందరినీ రాజకీయంగా చితక్కొట్టాలని రెవెన్యూశాఖ మంత్రి ధర్మాన ప్రసాదరావు పేర్కొన్నారు. శ్రీకాకుళం జిల్లా కేంద్రంలోని అరసవల్లిలో శుక్రవారం నిర్వహించిన గడపగడపకులో, గార మండలం అంపోలులో జరిగిన మార్కెట్‌ కమిటీ నూతన పాలకవర్గం అభినందన సభలో ఆయన మాట్లాడారు. ‘విశాఖను రాజధానిగా చేస్తే చంద్రబాబుకు వచ్చిన కష్టమేమిటి? మారుమూల ప్రాంతాలు అభివృద్ధి చెందనవసరం లేదా? మేం మనుషులం కాదా... మాకు సదుపాయాలు అక్కర్లేదా...? విశాఖను రాజధానిగా వద్దనుకుంటూ శ్రీకాకుళం వస్తారంటా.. మన పీక కోయడానికి అరసవల్లి వస్తారంటా...’ అని మంత్రి ధర్మాన వ్యాఖ్యానించారు.

సీఎం అనుమతిస్తే రాజీనామా చేసి ఉద్యమించాలని యోచిస్తున్నా
‘విశాఖలో రాజధాని రాకుండా చేసే వారిని శత్రువులుగానే మనం చూడాలి. ఇందుకు ఒక ఉద్యమాన్ని చేయాల్సిన అవసరం ఉంది. ప్రజలు, ముఖ్యమంత్రి అనుమతిస్తే రాజీనామా చేసి ఉద్యమానికి వెళ్లిపోదామా అనే ఆలోచన ఉంది. పార్టీ పరంగా కాకుండా వ్యక్తిగతంగా నా గొంతెత్తితే లక్షలాది మంది అనుసరిస్తారన్న నమ్మకం ఉంది...’ అని రెవెన్యూ మంత్రి ధర్మాన ప్రసాదరావు పేర్కొన్నారు. ఇలాంటి అన్యాయాన్ని అరికట్టేందుకు అంతా ఏకతాటిపైకి రావాలని ఆయన పిలుపునిచ్చారు.