Vizag Railway Zone: విజయసాయిరెడ్డి గారూ... రైల్వే జోన్‌కు శంకుస్థాపన ఏదీ?

గత పదిరోజులుగా ఊదరగొడుతూ  ప్రచారం చేశారుగా...!?
ప్రస్తుత మోదీ పర్యటనలో లేదని తేల్చిచెప్పిన ఎంపీ జీవీఎల్‌
ఉత్తరాంధ్ర వాసుల ఆశలపై నీళ్లు

ఈనాడు, విశాఖపట్నం: ప్రధాని విశాఖ పర్యటనలో శంకుస్థాపనలు, ప్రారంభోత్సవాలు చేయనున్న, జాతికి అంకితం చేసే జాబితాలోని 9 ప్రాజెక్టుల్లో విశాఖ రైల్వే జోన్‌ లేకపోవడంతో ఉత్తరాంధ్ర వాసుల ఆశలపై నీళ్లు జల్లినట్లయింది. ఎంపీ విజయసాయి చేసిన ప్రచారం అవాస్తవమని తేలిపోయింది. ఉత్తరాంధ్ర వాసుల దశాబ్దాల కల అయిన రైల్వే జోన్‌కు ప్రధాని శంకుస్థాపన చేస్తారంటూ... ఆయన పర్యటన ఖరారైన నాటి నుంచి విజయసాయిరెడ్డి ఊదరగొడుతూ వచ్చారు.

బుధవారం రాజ్యసభ సభ్యుడు జి.వి.ఎల్‌.నరసింహారావు పేర్కొన్న కార్యక్రమాల జాబితాలో ఈ అంశమే లేదు. దానిపై విలేకరులు ప్రశ్నలు అడిగినప్పుడు... రైల్వే జోన్‌కు శంకుస్థాపన చేయాలని తామూ కోరామని ఒకసారి, ప్రత్యేక కార్యక్రమంగా నిర్వహిస్తామని మరోసారి జీవీఎల్‌ పేర్కొనడం గమనార్హం. ప్రధాని కార్యక్రమాల్లో రూ.460 కోట్లతో రైల్వేస్టేషన్‌ ఆధునికీకరణ ప్రాజెక్టు ఉంటుందని అధికారులు చెబుతూ వచ్చారు. కానీ విజయసాయిరెడ్డి తన ఫేస్‌బుక్‌ ఖాతాలో... నవంబరు 12న ప్రధాని చేతుల మీదుగా రైల్వే జోన్‌కు శంకుస్థాపన జరగనుందని పోస్టు పెట్టారు. ప్రధాని మోదీకి ముఖ్యమంత్రి జగన్‌ పుష్పగుచ్ఛం ఇచ్చి అభినందిస్తున్నట్టుగా ఉన్న ఒక ఫొటోను పొందుపరిచారు.