సీఎం సభ కోసం పొలం పాడుబెట్టాలా?

గుడివాడ రైతుల ఆవేదన

గుడివాడ గ్రామీణం, న్యూస్‌టుడే: ముఖ్యమంత్రి బహిరంగ సభ నేపథ్యంలో అపరాల పంట వేయొద్దని ఎమ్మెల్యే తమకు హుకుం జారీ చేశారని.. అదును తప్పితే నష్టపోతామని పలువురు రైతులు గుడివాడ మాజీ ఎమ్మెల్యే రావి వెంకటేశ్వరరావు వద్ద వాపోయారు. కృష్ణా జిల్లా గుడివాడ మండలం మల్లాయపాలెం టిడ్కో ఇళ్ల సమీపంలో వచ్చే నెల 21న సీఎం జగన్‌మోహన్‌రెడ్డి సభ జరగనుంది. అందుకని.. తాము కౌలు చేస్తున్న 14 ఎకరాల్లో అపరాల పంట వేయొద్దని ఎమ్మెల్యే కొడాలి నాని ఆదేశించారని రైతులు నాగేశ్వరరావు, నాగరాజు శుక్రవారం ‘ఇదేం ఖర్మ’ కార్యక్రమంలో పాల్గొన్న మాజీ ఎమ్మెల్యే రావి వెంకటేశ్వరరావు వద్ద వాపోయారు. పస్తుతం అదును పోతుందని.. ఎకరాకు రూ.30 వేల వరకు నష్టపోతామని ఆవేదన వ్యక్తం చేశారు. దీనిపై రావి వెంకటేశ్వరరావు మాట్లాడుతూ కౌలు రైతులకు నష్టం జరగకుండా చూడాలని.. లేని పక్షంలో రైతులతో కలిసి సీఎం సభను అడ్డుకుంటామని హెచ్చరించారు. అనంతరం ఆర్డీవో పి.పద్మావతితో మాట్లాడి నష్ట పరిహారం అందేలా చర్యలు తీసుకోవాలని కోరారు.