వ్యవసాయ చట్టాల అమలుకు మళ్లీ యత్నం: కూనంనేని

ఈనాడు, హైదరాబాద్‌: మూడు సాగు చట్టాలను రద్దు చేస్తామని చట్టాలను మళ్లీ అమలు చేసేందుకు ప్రధాని మోదీ ప్రయత్నిస్తున్నారని సీపీఐ రాష్ట్ర కార్యదర్శి కూనంనేని సాంబశివరావు ఆరోపించారు. కేంద్ర ప్రభుత్వం రైతు వ్యతిరేక విధానాలు అవలంబిస్తోందని పేర్కొంటూ.. అందుకు వ్యతిరేకంగా దేశవ్యాప్తంగా రైతు సంఘాలు నిరసన కార్యక్రమాలు చేపట్టాయి. ఇందులో భాగంగా శనివారం రాజ్‌భవన్‌కు ర్యాలీ నిర్వహిస్తున్న రైతులను, నాయకులను పోలీసులు అడ్డుకోవడాన్ని ఆయన ఖండించారు. ‘‘స్వామినాథన్‌ సిఫారసులను అమలు చేయాలని, వ్యవసాయ ధరలు నిర్ణయించే కమిటీల్లో తమకు ప్రాతినిధ్యం కల్పించాలని, విద్యుత్‌ సవరణ చట్టాన్ని రద్దు చేయాలని, సన్న, చిన్నకారు రైతులకు రూ.5 వేల పింఛన్‌ ఇవ్వాలని, వ్యవసాయ రుణాలను రద్దు చేయాలని అన్నదాతలు కోరుతున్నారు. దీనిపై రాజ్‌భవన్‌కు శాంతియుతంగా ప్రదర్శన చేపడితే పోలీసులు అప్రజాస్వామికంగా అడ్డుకున్నారు. గిరిజనులు సాగు చేసుకుంటున్న భూములకు హక్కులు ఇవ్వకుండా అటవీ సంరక్షణ చట్టం-2022 పేరుతో వారిని అడవుల నుంచి వెళ్లగొట్టి కార్పొరేట్‌ శక్తులకు అప్పగించేందుకు యత్నిస్తున్నారు. వ్యవసాయ ఉత్పత్తుల ధరల నిర్ణయానికి రైతులతో కలిపి ఒక కమిటీ వేస్తామన్న కేంద్రం కార్పొరేట్‌ సంస్థలతో కమిటీ వేసింది. ముగ్గురు రైతులను మాత్రమే కమిటీలోకి తీసుకోవడం ఆక్షేపణీయం’’ అని కూనంనేని విమర్శించారు.