రాముడికి నిధులు ఎగ్గొట్టినోళ్లు ప్రజలకేం మేలు చేస్తారు

తీన్మార్‌ మల్లన్న

భద్రాచలం పట్టణం, న్యూస్‌టుడే: భద్రాచలం రామాలయ అభివృద్ధికి రూ.100 కోట్లు ప్రకటించి ఎగ్గొట్టినోళ్లు ప్రజలకేం మేలు చేస్తారని చింతపండు నవీన్‌ కుమార్‌ అలియాస్‌ తీన్మార్‌ మల్లన్న ప్రశ్నించారు. ఆయన చేపట్టిన ‘7,200 ఉద్యమ’ పాదయాత్ర శనివారం భద్రాచలంలో ప్రారంభమైంది. ఈ సందర్భంగా స్థానిక ప్రభుత్వ కళాశాల మైదానంలో ఏర్పాటు చేసిన బహిరంగ సభలో మాట్లాడారు. అవినీతి రహిత సమాజ నిర్మాణం, ఉచిత విద్య, వైద్యం నినాదాలతో మహా పాదయాత్రను ప్రారంభించినట్లు చెప్పారు. తెలంగాణను 7,200 మంది పట్టిపీడిస్తున్నారని, వీరి సంఖ్యను సున్నా చేయడమే తమ లక్ష్యమన్నారు. బంగారు తెలంగాణ కోసం అనేక మంది త్యాగాలు చేస్తే తానే రాష్ట్రాన్ని తెచ్చానని కేసీఆర్‌ గొప్పలు చెప్పుకొంటున్నారని విమర్శించారు. రూ.16 వేల కోట్ల నికర ఆదాయంతో రాష్ట్రం ఏర్పాటైతే రూ.5 లక్షల కోట్ల అప్పుల తెలంగాణగా మార్చిన ఘనత ఆయనదేనన్నారు. పోడు భూముల విషయంలో గిరిజనులకు హామీలిచ్చి అధికారులను ఉసిగొల్పడం వల్లే అటవీ అధికారి ప్రాణాలు కోల్పోయారని ఆరోపించారు. అవినీతిమయంగా మారిన తెరాస పాలన నుంచి విముక్తి కోసం కొట్లాడేందుకు జనం తరలిరావాలని కోరారు.