Raghurama: నలుగురి చేతుల్లోనే ఏపీ ప్రభుత్వం: రఘురామ

ఈనాడు, దిల్లీ: కులం చూడం, మతం చూడబోమని సీఎం జగన్‌ తరచూ చెబుతున్న మాటలకు చేతలకు పొంతన ఉండదని వైకాపా ఎంపీ రఘురామకృష్ణరాజు విమర్శించారు. ఆంధ్రప్రదేశ్‌ ప్రభుత్వాన్ని తన సామాజిక వర్గానికే చెందిన నలుగురి చేతుల్లో పెట్టారన్నారని ఆరోపించారు. దిల్లీలో శనివారం ఆయన విలేకరులతో మాట్లాడుతూ... నిబంధనలను తుంగలో తొక్కిన సీఎం జగన్‌మోహన్‌రెడ్డి 12 మంది సీనియర్‌ ఐపీఎస్‌ అధికారులను కాదని కడప జిల్లాకు చెందిన కసిరెడ్డి రాజేంద్రనాథ్‌రెడ్డిని డీజీపీగా తీసుకున్నారు. సీఎస్‌గానూ అదే జిల్లాకు చెందిన ఐఏఎస్‌ అధికారిని నియమించనున్నారు. సీఎంవోను పూర్తిగా పులివెందులకు చెందిన ఐఏఎస్‌ అధికారి నియంత్రిస్తున్నారు. జగన్‌ తర్వాత కసిరెడ్డి రాజేంద్రనాథ్‌రెడ్డి, జవహర్‌రెడ్డి, ధనుంజయరెడ్డి, సజ్జల రామకృష్ణారెడ్డి రాష్ట్ర ప్రభుత్వ వ్యవహారాల్లో కీలకపాత్ర పోషిస్తున్నారు. పార్టీపరంగా నియమించిన సమన్వయకర్తల్లోనూ 90% మంది సీఎం సొంత సామాజిక వర్గానికి చెందిన వారే ఉన్నారు. దళితులు, గిరిజనులు, మైనారిటీలకు అసలు చోటే కల్పించలేదు’ అని ఆరోపించారు.