Gujarat Election 2022: వచ్చేది ఆప్‌ సర్కారే.. కాగితంపై రాసి మరీ కేజ్రీవాల్‌ ధీమా

అహ్మదాబాద్‌: గుజరాత్‌లో ఈ దఫా ఆమ్‌ ఆద్మీ పార్టీ (ఆప్‌) ప్రభుత్వం ఏర్పాటవడం ఖాయమని ఆ పార్టీ జాతీయ కన్వీనర్‌, దిల్లీ సీఎం అరవింద్‌ కేజ్రీవాల్‌ సంపూర్ణ విశ్వాసం వ్యక్తం చేశారు. రాష్ట్రంలో త్వరలో జరగనున్న అసెంబ్లీ ఎన్నికల్లో ఆప్‌ విజయం సాధిస్తుందని రాతపూర్వకంగా ఉద్ఘాటించారు. సూరత్‌లో ఆదివారం విలేకర్ల సమావేశంలో ఆయన మాట్లాడారు. ఎన్నికల్లో తమ పార్టీకి మద్దతివ్వాలని రాష్ట్ర ప్రభుత్వ ఉద్యోగులకు విజ్ఞప్తి చేశారు. తాము అధికారంలోకి వస్తే.. వచ్చే ఏడాది జనవరి 31 నుంచే పాత పింఛను పథకాన్ని తిరిగి అమల్లోకి తీసుకొస్తామని హామీ ఇచ్చారు. దిల్లీ, పంజాబ్‌ అసెంబ్లీ ఎన్నికల్లో ఆప్‌ గెలుస్తుందని తాను చెప్పిన జోస్యం నిజమైందని గుర్తుచేశారు. గుజరాత్‌లోనూ అదే జరుగుతుందని చెప్పారు. రాష్ట్రంలో ఆప్‌ ప్రభుత్వాన్ని ఏర్పాటుచేస్తుందంటూ ఓ కాగితంపై రాసిమరీ చూపించారు.