వైకాపాను నమ్ముకుంటే కష్టాలే..ఎమ్మెల్సీ ఎదుట విలపించిన ఆ పార్టీ నాయకురాలు

హిందూపురం అర్బన్‌, న్యూస్‌టుడే: వైకాపా అధికారంలోకి రావాలని ఎంతో కష్టపడితే.. ఇప్పుడు తనపైనే కేసు పెట్టి వేధిస్తున్నారని శ్రీసత్యసాయి జిల్లా హిందూపురం పరిధిలోని కొట్నూరుకు చెందిన ఆ పార్టీ వార్డు కన్వీనర్‌ సునీత విలపించారు. హిందూపురం మండల సర్వసభ్య సమావేశంలో పాల్గొనేందుకు ఎమ్మెల్సీ మహ్మద్‌ ఇక్బాల్‌ మంగళవారం ఎంపీడీవో కార్యాలయం వద్దకు రాగా.. సునీత తన గోడు వినిపించారు.

కొట్నూరు జాతీయ రహదారి సమీపంలో తనకు 42 సెంట్ల స్థలం ఉందని, అందులో 21 సెంట్ల భూమి ముద్దిరెడ్డిపల్లికి చెందిన ఓ ప్రముఖుడి కుమారుడు ఆక్రమించుకున్నారని ఆమె ఆరోపించారు. మిగిలిన భూమిలో పెట్టిఅంగడితో జీవనం సాగిస్తుంటే దాన్నీ ఇటీవల పొక్లెయిన్‌తో తొలగించి, తనపైనే ఎస్సీ, ఎస్టీ కేసు నమోదు చేశారని విలపించారు. ఈ సమస్యపై సంబంధిత అధికారులతో మాట్లాడి పరిష్కారమయ్యేలా చూస్తానని ఎమ్మెల్సీ ఆమెను ఓదార్చారు. అంతకు ముందు సునీత విలేకరులతో మాట్లాడుతూ.. వైకాపాను నమ్ముకుంటే కష్టాలు తప్పవని ఆవేదన వ్యక్తం చేశారు.