కాంగ్రెస్‌ బలోపేతానికి కృషి చేస్తాం: రుద్రరాజు

ఈనాడు, దిల్లీ: రాష్ట్రంలో కాంగ్రెస్‌ బలోపేతానికి కృషి చేస్తామని పీసీసీ అధ్యక్షుడు గిడుగు రుద్రరాజు తెలిపారు. మంగళవారం దిల్లీలో ఏఐసీసీ అధ్యక్షుడు మల్లికార్జున ఖర్గేను రుద్రరాజు, పీసీసీ కార్యవర్గ సభ్యులు మర్యాదపూర్వకంగా కలిశారు. అనంతరం విలేకర్లతో రుద్రరాజు మాట్లాడుతూ.. చింతన్‌ శిబిర్‌లో తీసుకున్న నిర్ణయం మేరకు రాష్ట్ర కాంగ్రెస్‌ పగ్గాలు యువ నాయకత్వానికి అప్పగించారన్నారు. రాష్ట్రంలో కాంగ్రెస్‌ పార్టీ బలోపేతానికి ఖర్గే దిశానిర్దేశం చేశారని తెలిపారు. యువత, విద్యార్థి, మహిళా కాంగ్రెస్‌ అనుబంధ విభాగాలను బలోపేతం చేస్తామని, సీనియర్ల సలహాలు, సూచనలు తీసుకుంటూ సమన్వయంతో పని చేస్తామన్నారు. ఖర్గేను కలిసిన వారిలో ఏఐసీసీ కార్యదర్శి సీడీ మయ్యప్పన్‌, మహిళా కాంగ్రెస్‌ రాష్ట్ర ఇన్‌ఛార్జి అజీనా, కార్యనిర్వాహక అధ్యక్షులు సుంకర పద్మశ్రీ, మస్తాన్‌వలీ, రాకేశ్‌ రెడ్డి, జంగా గౌతమ్‌, ఎన్‌ఎస్‌యూఐ రాష్ట్ర అధ్యక్షుడు నాగ మధు యాదవ్‌ తదితరులున్నారు.