చంద్రబాబు పర్యటన భగ్నంచేసేందుకు వైకాపా కుట్రలు

డీజీపీకి వర్ల రామయ్య ఫిర్యాదు

ఈనాడు-అమరావతి: జడ్‌ ప్లస్‌ కేటగిరీ రక్షణ ఉన్న ప్రతిపక్షనేత చంద్రబాబునాయుడు పర్యటనను భగ్నం చేసేందుకు వైకాపా నేతలు కుట్రలు చేస్తున్నారని తెదేపా పొలిట్‌ బ్యూరో సభ్యులు వర్ల రామయ్య డీజీపీకి మంగళవారం ఫిర్యాదు చేశారు. ఈ పర్యటనకు ఏలూరు ఎస్పీ, సంబంధిత పోలీసు అధికారుల నుంచి అనుమతులు తీసుకున్నాసరే వైకాపా నేతలు అనేక కౌంటర్‌ కార్యక్రమాలు మొదలుపెట్టారని పేర్కొన్నారు.. చంద్రబాబు పర్యటన మార్గంలో తెదేపా జెండాలు, పోస్టర్లు కనిపించకుండా వైకాపా బ్యానర్లు, ఫ్లెక్సీలతో నింపేశారన్నారు. వైకాపా మద్దతుదారులు, సంఘ విద్రోహులతో చంద్రబాబు పర్యటనకు అంతరాయం కలగకుండా చర్యలు తీసుకోవాలని, పటిష్ట భద్రత కల్పించాలని వర్ల రామయ్య కోరారు.