మూడు రాజధానుల బిల్లు తీసుకొస్తామనడం కోర్టు ధిక్కరణే

వైకాపా ఎంపీ రఘురామకృష్ణరాజు

ఈనాడు, దిల్లీ: మూడు రాజధానుల బిల్లును తిరిగి తీసుకువస్తామని రాష్ట్ర ప్రభుత్వ సలహాదారు సజ్జల రామకృష్ణారెడ్డి ప్రకటించడం ముమ్మాటికి కోర్టు ధిక్కరణే అవుతుందని వైకాపా ఎంపీ రఘురామకృష్ణరాజు అన్నారు. హైకోర్టు తీర్పుపై స్టే కోరుతూ రాష్ట్ర ప్రభుత్వమే సుప్రీంకోర్టును ఆశ్రయించిందన్నారు. సుప్రీంకోర్టులో కేసు పెండింగ్‌లో ఉండగానే మళ్లీ మూడు రాజధానుల బిల్లును తీసుకువస్తామనడం ఏమిటని ఆయన ప్రశ్నించారు. దిల్లీలో బుధవారం ఆయన విలేకరులతో మాట్లాడారు. ముఖ్యమంత్రి జగన్‌మోహన్‌రెడ్డి బాబాయ్‌ వై.ఎస్‌. వివేకానందరెడ్డిని చంపింది ఎవరనే ప్రశ్నకు సమాధానం అందరికీ తెలుసని అయినా ఎవరూ బహిరంగంగా చెప్పలేరన్నారు. వివేకా హత్య కేసు విచారణను ఏపీ నుంచి హైదరాబాద్‌కు బదిలీ చేస్తూ సుప్రీంకోర్టు పలు కీలక వ్యాఖ్యలు చేసిందని రఘురామ పేర్కొన్నారు.