బడులు మూశారు.. బారులు తెరిచారు

బీసీ సంక్షేమ సంఘం జాతీయ అధ్యక్షుడు జాజుల శ్రీనివాస్‌గౌడ్‌

జడ్చర్ల పట్టణం, న్యూస్‌టుడే: బంగారు తెలంగాణలో 4,500 పాఠశాలలు మూసివేశారని, అదే సమయంలో భారీ సంఖ్యలో బారులు తెరుస్తున్నారని బీసీ సంక్షేమ సంఘం జాతీయ అధ్యక్షుడు జాజుల శ్రీనివాస్‌గౌడ్‌ ఆరోపించారు. ఈ నెల 4న మహబూబ్‌నగర్‌ జిల్లా పర్యటనకు వస్తున్న ముఖ్యమంత్రి కేసీఆర్‌ దీనికి సమాధానం చెప్పాలన్నారు. జడ్చర్లలో శుక్రవారం నిర్వహించిన బీసీ విద్యార్థి, యువజనుల పోరు యాత్ర ప్రారంభోత్సవ కార్యక్రమంలో ఆయన మాట్లాడారు. చదువు, సామాజిక న్యాయ సాధన కోసం పాలమూరు జిల్లా నుంచి రాష్ట్రవ్యాప్తంగా పోరు యాత్ర చేపట్టామన్నారు. విద్యార్థులకు ఫీజు బకాయిలు ఇవ్వకుండా అరిగోస పెడుతున్నారని, వారు తలచుకుంటే ప్రభుత్వాలే కూలిపోతాయని హెచ్చరించారు. విద్యార్థులకు ఇచ్చే ఉపకార వేతనాలు పెంచాలని డిమాండ్‌ చేశారు. జనాభాలో అరశాతం ఉన్న వారు అధికారం అనుభవిస్తున్నారన్నారు. రాజ్యాధికారం జనాభాలో 60 శాతం ఉన్న బీసీల జన్మహక్కు అని అన్నారు. ‘వచ్చేది బీసీ రాజ్యమే.. అయ్యేది బీసీ ముఖ్యమంత్రే’ అనే నినాదంతో ముందుకు పోదామని జాజుల ఈ సందర్భంగా పిలుపునిచ్చారు.