తూర్పు తీరాన్ని గుప్పెట్లో పెట్టుకునేలా జగన్‌ ప్రణాళిక

శాసనమండలిలో ప్రతిపక్షనేత యనమల ఆరోపణ

తుని, న్యూస్‌టుడే: రాష్ట్రంలో శ్రీకాకుళం నుంచి నెల్లూరు వరకూ ఉన్న తూర్పు సముద్రతీర ప్రాంతాన్ని జగన్‌ తన బినామీల ద్వారా ఆక్రమించి, గుప్పెట్లో పెట్టుకోవడానికి ప్రణాళిక అమలు చేస్తున్నారని శాసనమండలి ప్రతిపక్షనేత, మాజీ మంత్రి యనమల రామకృష్ణుడు ఆరోపించారు. కాకినాడ జిల్లా తునిలో విలేకర్లతో శనివారం ఆయన మాట్లాడారు. ‘బినామీల ద్వారా భూములు సేకరించి, షేరు ఇస్తేనే పరిశ్రమలు పెట్టుకోవడానికి అనుమతులు ఇస్తున్నారు. విజయసాయిరెడ్డి అల్లుడు, జగన్‌కు కావాల్సిన వాళ్లు అరబిందో పరిశ్రమ స్థాపనకు పనులు చేస్తున్నారు. గన్నవరం, విశాఖ, కృష్ణపట్నం వంటి పోర్టుల పరిధిలోను ఇలానే జరుగుతోంది...’ అని యనమల పేర్కొన్నారు. అసమర్థ పాలనతో రూ.1.73 లక్షల కోట్ల విలువైన పరిశ్రమలు ఇతర రాష్ట్రాలకు వెళ్లిపోయాయని ధ్వజమెత్తారు. బల్క్‌ డ్రగ్‌ వంటి కాలుష్య భరిత పరిశ్రమలతో తీవ్ర నష్టం వాటిల్లుతుందన్నారు. గాలి, నీరు, భూమి, భూగర్భజలాలు హానికరంగా మారిపోతే ప్రజల పరిస్థితి ఏమిటని ప్రశ్నించారు. అందుకే తాము జాతీయ హరిత ట్రైబ్యునల్‌ను ఆశ్రయించామని చెప్పారు.