వైకాపా నేతల కనుసన్నల్లో ‘జూదం మాఫియా’

సీఎం జగన్‌కు ఎమ్మెల్యే అనగాని సత్యప్రసాద్‌ లేఖ

ఈనాడు డిజిటల్‌, అమరావతి: బాపట్ల జిల్లా రేపల్లె సమీపంలోని కృష్ణా నదీ పరివాహక ప్రాంతంలో వైకాపా ఎంపీ మోపిదేవి వెంకటరమణ అండదండలతో ఆయన కుటుంబ సభ్యులు జూదం మాఫియాను పోషిస్తున్నారని తెదేపా ఎమ్మెల్యే అనగాని సత్యప్రసాద్‌ ధ్వజమెత్తారు. జూద శిబిరాలను నియంత్రించి, నిర్వాహకులపై చట్టపరంగా చర్యలు తీసుకోవాలని కోరుతూ సీఎం జగన్‌కు శనివారం ఆయన లేఖ రాశారు. ‘రేపల్లెలోని కృష్ణా పరిసరాల్లో జరుగుతున్న క్లబ్బులపై పోలీసులు ఎందుకు చర్యలు తీసుకోవడం లేదు.  మోర్తోట సమీపంలోని దిబ్బలు, ద్వీపాల్లో మోపిదేవి కుటుంబ సభ్యులు, పేటేరులో రేపల్లె 25వ వార్డు వైకాపా కౌన్సిలర్‌ జమీర్‌ ఆధ్వర్యంలో జూద శిబిరాలు నడుస్తున్నాయి. ఇక్కడి అసాంఘిక కార్యకలాపాలపై ప్రభుత్వం చర్యలు తీసుకోవాలి’ అని సత్యప్రసాద్‌ పేర్కొన్నారు.